MPF 轉倉

越來越接近走佬的日子，要處理的事情（瑣事跟大事）其實也很多，其中一項to-do-list就是MPF轉倉。

行文之時其實轉倉動作已經完成，現在只需要靜待戶口轉換完成就OK了。

至於轉倉背後原因其實是十分簡單：
（1）因為開了離岸戶口，轉倉MPF戶口可以一併計算最低資產要求
（2）自己選用HSBC MPF已經多年，雖然自覺成績還可以，但坊間都一般認為HSBC的MPF的表現異常差勁，所以我又試試轉倉，看看會否有更好回報。

好了，決定後就是轉倉前後的準備。 轉倉前的行動相對簡單容易，基本上只需要約定你將會轉倉的受託人，就會有專人幫忙處理好所有手續（當然啦，有生意喎）。 你本人只需要準備好身份證及現有受託人資料就可以了，非常簡單。
而我就稍做了多一點點準備，就是在等待轉倉時，更改了現有MPF資產配置。由於轉倉只是一個大約時間表（約3-4星期），但不同股票買賣並沒有準確的買賣時間，所以我決定在等待其間先將資產配置轉得保守，以免突然而來的市場變動。

我最初的MPF配置是70%美股；20%環球債券；10%港股。 由於將要轉倉，我決定先將MPF轉回保守配置，現在變成70%環球債券；20%美股；10%港股，簡單而言，就是將美股跟環球債券的權重對調。萬事俱備，現在只需要靜待轉倉完成！

其實非也，仍有項to-do-list要做，就是當轉倉MPF後，又應該如果選擇新的MPF配置呢？

我和很多人一樣，面對超多的基金成分選擇，會覺得很煩，所以我決定使用最喜歡的排除法：

1)亞太區股票除了香港，台灣及日本，全部不選擇，原因是除了這些國家外，其他股票時不熟悉亦不想去了解，所以同一道理，也不會選歐洲股票。
2)優先選擇被動型指數基金，原因簡單，因為收費最平，可惜宏利MPF只有一隻被動指數基金可供選擇。
3)不選擇退休基金，因為仍未可能退休，而且如果我要選擇保守型投資，大可選擇債券或現金型基金。
4)類型相近的基金，一定會選擇收費低，所以我不會選擇香港股票基金，而會選恒指基金，同樣操作，我亦用於HSBC MPF。我發現很多MPF受託人都喜歡巧立名目，製造多隻基金混淆視聽，只要仔細看一下十大投資公司，其實很多都大同小異，唯一有分別不就是管理人收費。

好了，定好排除法後，餘下以下選項（括號內是我的級別所收取的管理費）

恒指基金 (0.85%)
日本股票 (1.20%)
北美股票 (1.20%)
康健護理 (1.85%)
國際債卷 (1.00%)

當中，我最不熟悉的是日本股票及康健護理，所以我下一步將會詳細閱讀一下這兩款基金的十大持股。 對於日本市場，我總覺得她會是沉睡的獅子，一旦醒來，應該可以有一番作為。 而康健護理基金，基本上只有宏利可以選擇。 老人化及越來越強勁的病毒，我相信康健護理必然是下一個會爆發的市場。

圖文不符，買了車厘子給長輩，其中一顆長得胖胖脹脹，還有一片小葉子，實在太可愛！
希望我的財富都有日達至結果收成階段啦！

【財仔股】飛機租賃

世事難料，想不到未買入安全的 ETF 竟然先買入財仔股。

本星期，發現中國飛機租賃業績不錯，然後再發現輕微減息後現價竟然有10%息率。
決定壯士斷臂，賣出太古換入部份中國飛機租賃。反正太古因為國泰之拖後腳，應該還是有排蝕。

大家同樣靠航空業生存，為什麼借飛機會比揸飛機更好賺呢？

看了一下年報，借飛機給航空公司真是一門好賺錢的生意，原來借賃公司借出飛機後 ，航空公司是要自付保養維修等等的費用。而飛機租賃公司就是躺著收租就好。

看了一些其他人對這個行業的評論，評論都是飛機租賃行業競爭激烈。
一門穩賺不賠的行業，競爭激烈似乎是必然的，但投資飛機租賃要放入高資本，資金門檻一點都不低，所以我相信不是一般的財仔可以入門的。
我大概看了一下中國最大的飛機租賃公司，不是國家中資背景就是內銀背景，還有一個叫李嘉誠背景，這行業哪容易隨便進入競爭啊？而且現時政局不穩，相信內地會對非中資的財仔加強監管，而飛機借賃在內地最大的公司其實是美國企業。當美國無運行時，相信就是中資背景的財仔上位之時了！再加上，內循環概念，要刺激內需經濟發展，似乎財仔生意更是不二之選。

結論，除了入1848， 其實在看完味皇後，我認認真真地看了一下國銀租借的招股書，發現1606的財仔技似乎更勁，除了一半飛機財仔外，另一半是國家建設公路等的財仔，真在太強了，所以在業績前也忍不住入手了。

【ETF 】選擇困難症 1

ETF Exchange Traded Fund


既然偶像畢老的巴郡也要買 ETF，作為忠實粉絲的我，肯定又再研究下。

為什麼說「又再」研究呢，因為我算是曾經買過指數 ETF （因為不知誰叫我要買），然後我也介紹朋友買過。但其實由始至終我只買過一隻 2800 盈富基金 。
數年前在市場低位買入，當時 2800 利息有4%，然後股市大升，有錢賺，理所當然就賣掉囉。

現在的我，只有在 MPF 買入美股自選股票及恆生指數（應該也算 ETF 呢），我覺是時機把我 MPF 以外的投資也分散一下。

由於才剛開始仔細看，資料量有點多，所以單純紀錄做筆記，免得之後把資料忘記。
所以，絕對絕對不構成買賣建議的 。
（如果像我這樣的投資初哥，又剛在股票市場損手爛腳，你也勇敢跟進，那是看倌的勇氣表現！）

首先，目標 ETF 要包括以下條件：

• 除了香港以外的市場（因為我超過一半的財產都投資在香港股票（還要大部份是舊經濟股，好慘），我覺得香港比例已經太高了，現在是時侯要放眼世界了。

• 考慮研究商品 ETF，就是黃金 ETF 啦。而且我五行要金，在八字來說應該 OK（完全不負責任的條件）。

• 暫時不想開 IB 戶口，所以要能夠在香港投資戶口交易的 ETF。如果不考慮這個條件，我應該會買 VOO （原因：管理費低，只需要 0.03%，流動性也比香港發行 ETF 高 10 倍以上，每天可以逹到 4 百萬美元交易額，也有利息派發。條件實在比香港的 ETF 高太多了）

•  希望 ETF 的成份比例盡量不要跟我的股票投資版塊重複。（包括香港地產股，房託及綜合企業類，看到這裡，應該明白為什麼這一次我傷得那麼深吧）。因此，我就不考慮 REITS 主題的 ETF 。題外話，寫到此，發現我除了 1883， 組合裡完全沒有網絡，科技電訊相關的行業。

• 相同類型條件的 ETF，我會選擇規模比較大（流動性高) ，費用比較低（這不用解釋吧）。

好！條件列完，到底市場上有沒有合適我的 ETF 呢？

首先，先看看實貨 ETF！因為選擇多，那就採用去除法吧。

我對石油沒有興趣，所以不會選。
現在各國印錢而導致的現金貶值，那最好是投資黃金或白銀 ETF 吧？（我想....)
既然兩者一樣我就直接選金 ETF 吧!

其實在研究 ETF 的過程中，我有看過 阿豬移民日記 YouTube 。
他提到白銀 ETF 其實是黃金 ETF 的加強版。可是對我來說實在太複雜，還是簡簡單單追蹤黃金就好。如果有興趣就自己去看看吧。

題外話，阿豬移民日記 YouTube 真的是超高質素的視頻，資料豐富又簡單易明，看得出來阿豬花了很長時間去免費分享這些資料，在香港實在難能可貴。

好！回來我的黃金 ETF ！

知識改變命運！

作為股票界的儍瓜達人，肯定是 Google 大師啦，一查，不到一分鐘就得出以下資料：

「現時港交所就有 3 隻黃金 ETF，分別是 SPDR 金 ETF (02840) 、

價值黃金 (03081) 及恒生人幣金 ETF (83168)。」

非常好！只有 3 隻，應該很容易搞定。

咦？！為什麼 3 隻 ETF 的數字字頭不同的呢？以我僅有的股票知識，我知道不同數字的開頭是代表不同種類的股票，但代表什麼呢？
我只有印象 8 字開頭是創業板，那其他呢 （黑人問號？？？）

當然又查一查萬能的 Google 大師啦，原來如下：

(資料來源：Investcoo）

好了，知道就好，大致明白後（就是差不多先生精神），又回到黃金 ETF。

花了一點時間，左查右查，終於總結了以下表格。
我加了兩隻美國的黃金 ETF，但由於沒有耐心，就先不查美國那邊的資料，反正我就是要買香港的 ETF 嘛 。（請容許我把名稱照紀錄一下，因為我怕之後如果想投資美國市場時會忘記。）

地區	Name	發行商	Currency	市值 （2020/8/10）	收市價 (2020/8/13）	日成交額 (2020/8/13）	管理費	52 週高/低
USA	iShare Gold Trust (IAU)	Black Rock	USD	TBA	TBA	TBA	0.25%	TBA
USA	SPDR Gold Share (GLD)	State Stree Global Advisors	USD	TBA	TBA	TBA	0.40%	TBA
HK	SPDR 金 ETF (2840）	State Stree Global Advisors	HKD	6,053億	1,406	2.07 億	0.40%	1,069 - 1,508
HK	價值黃金 （03081）	盛寶	HKD	16.23 億	46.24	1.07千萬	0.35%	35.1 - 49.68
HK	恆生人民幣黃金 ETF （83168）	恆生	RMB	6.51千萬	33.4	23.38萬	0.36%	25.8 - 35.9

美國 IAU 的管理費好便宜呢！

看看香港發行的黃金 ETF，其實只要用表格一比較，一下子就變得很容易選擇。
雖然 3081 和 83168 的管理費相對便宜，但只要比較市值跟每日成交額，相距實在太遠，我想 2840 應該是比較好的選擇。

既然已決定，最後就是再檢查一下 2840 的詳細資料 SPDR 金 ETF 2840 。
這個 ETF 持有實金並進行買賣，而實金金條存放在倫敦 HSBC Bank USA 的金庫內，我想這是代表安全了。

認認真真做完功課後，總要考慮一下風險吧。

1. 投資黃金是沒有利息的，它只是單純一個抗通賬的產品。

買入黃金就是賭現金（或美金）會貶值，如果最終因為量化寬鬆而貨幣貶值，那這個投資肯定是值得的，因為購買力可以保持（前題當然是發行商沒有破產）。
反過來說，如最後現金沒有大幅貶值，輸的就是時間值。

2. 我看了一下黃金 ETF 的 52週波幅（應該跟國際金價一致）。

讓我非常吃驚的是，看起來安全，穩定，對沖通脹的黃金 ETF 竟然在一年間會有 40% 的上下波幅。意思是，如果這一年我在最高點買下黃金，我也是有可能蒸發一半的資產。

啊！真的嚇死我，那跟我買股票的風險不就是差不多?!

寫到這裡，我想我快要死了！
為什麼光寫實物 ETF 的選擇，已經那麼大的一篇，而且腦細胞也死掉一半？
我還未開始看國際指數 ETF 呢！

待續..... 如果還有的話 ......

資產配置更新

最近數月，恆指基本上徐徐上升，很多人參與的新經濟，其實不太明白，所以沒份賺錢。

基本上，作了比較大的動作包括：

出清死人匯豐，換貨 900 （算係以金融換金融，但賺返息）。

加碼惠記（期望內房及公路回復收費後，盈利可以穩健上升，派息可以保持現價水平 8% 我就心滿意足了）。

加碼1883（炒功課地想相信數據生意越做越有，現價亦超過 8%息，期望成為我隊內的 10% 股票仔仔。不經不覺間1883已成為我現在最大持股。）

另外，REITs 基本上我沒有作大動作 。

3隻REITs 加埋佔我持股 1/4，對我整個投資影響很大。

所以不用說也知，我至今整體投資仍然錄得驚嚇性的 -20% 損失，我知道是很差勁的表現。

但很快我將要完全使用被動收入維持我的生活，所以，REITs 依然不敢貿然去動。

其實，想加碼 778 的， 現價跌到很殘，也可以收 7.5% 息，以它的穩定性其實應該不差吧。

雖說 778 商場是疫情重災的零售為主，但畢竟大部份都是民生商場，應該不會差過海港城，又一城那些吧。但次次想加時，又會將錢投向息率同前境似乎更好的 1883呢（誰叫我的資金不是生生不息，無窮無盡，每一加注都有機會成本呢，唉）。

再加上我每次經過置富商場，就又會有一點影響我再加碼 778 的計劃。

喂～個商場都無人既，仲要黑沉沉咁，是否有計劃租出拍喪屍片乎？

小量賣出388，現價好高，利息好低，賣出套現金換高息股，也幫補一下賬面因賣清匯豐的高賬面損失。

今年換碼加注等，真係好傷，感覺數年努力的儲蓄一下子蒸發了很大部份（真的很多啊，起碼對我來說）。但最神奇是，這數個月賣下換下，手頭上的現金竟然上升（還因為擔心政治，很低能地換了部份美元，收 0.5% 定期，哈）。

而最感動的是預計收息額竟然上升，亦已經逹到我年頭訂下的全年目標年收息金額。

在賬面大跌的同時，竟然會逹到這個結果，倒是有點估不到的。

分手嗎？

一般人決定分手前的心情幾部曲。。。

1）突然有一日覺得條友唔得，如雷轟頂，總之突然條友樣樣都唔得，見到就好激心個隻。

2）忽然又感情到，覺得自己太無情，畢竟當中真係有一齊快樂過。

3）之後，又黎料，再唔得，條友肯定又做更多鬼人憎的事，好明顯係挑機兼挑戰底線！

4）又心軟（都咁多年感情，青春時間都俾哂佢）。我覺得大家係有真愛，所以佢應該明白的，只係爭少少了解。再強調當中真係有一段真正開心的日子。

5）又黎料，順便挑戰埋你底線下面條底線。

6）哎呀，再睇下啦！佢會變佢會改佢係善利（身邊有師奶八婆講野中），我地中間充滿愛及包容。

7）嘩！頂，又黎！唔忍啦，X街，你去死啦！！！

係！！我唔頂啦！分手分手分手！！！

以後不再見，死人匯豐老千股，放 Q 哂！！！！

好好玩之二手拍賣

最近試玩網上二手出讓拍賣，覺得好玩，好似自己做小生意咁。

貨源

當然是自己衰，買左無用，浪費左的錢，再循環的一切一切。
這點好好玩，因為可以一天到晚係屋企找有機會變成錢的 垃圾 貨源。

定價

嘩，這點真係堅難。
我最初的做法呢，就是把打算 POST 上網的貨品，用 KEYWORD 搜尋其他人的定價，然後照跟或是減一點價錢出讓。但過一段時間後發現，這個方法有些低能，因為讓我 SEARCH 到的都已經 POST 了一段時間, 代表賣唔出, 也代表價格過高。

那我是應該減價啦，可是又應該減多少呢？

減得太多，短時間有人表示有興趣，我就會立刻懷疑自己定價過低。
好啦，減得太少，都沒有人要理我，那又要減完再減？
反正結論是，只要我的定價有人表示有興趣，我就會覺得我一定標得太低，蝕底了。
然後我會再試試在網上去找其他不同資料的不同價格，然後我發現資訊量大到一個點，是看一年都不可能看完，然後就不想看，隨便賣就算。

寫到這裡，我想起以前考 ECON 必讀張五常的「賣桔者言」參考書。
考完公開試後，讀完的這本書理所當然完全還回教統局，大部份資料都忘記了，但我還記得其中有內容提及年宵市場每一位客人的賣/買一盤桔的價錢都不同（跟供求理論無關），因為獲取 INFORMATION 係有價錢的！

市場反應

這點呢，我覺得完全是靠運氣。
例如，我覺得好無聊的東西， HIT RATE 可以超高，我覺得好正的東西，又沒人理我！
好慘，原來真的是一命二運三風水，命裡有時終須有，命裡無時莫強求！

談判

好好玩，我覺得我勁喜歡人與人之間的真實溝通，反正有人問我就好開心，所以有人問我都好願意答。由於賣的都係家裡的「二手野」，有些人問的問題，我真的從來無想過（因為那東西我可能十年未開過！）。例如，有人問我，某 CD 裡面有沒有 POST CARD（真係鬼知咩）。我回家超興奮開 CD 來看，當我看到真有 POST CARD 竟然有拆禮物的好奇和興奮！

交貨

暫時我只會用面對面交收！
（內心戲：上次我交收時，就是那個客問我有沒有 POST CARD 那位，隨便看一看 CD 的盒，然係給我錢。那一刻，師奶上身的我超想問，你不要打開看一下有沒有 POST CARD嗎？不如你看一下啦。但係最後都是不敢問，收了錢就走人。）

無影彈弓手

9厘息丫嗱！減一半都有5厘息！

作為人生第一隻股票，而且石器時代都有參與供股的股東我，我同一眾苦海等食息的小股東一樣反應 O 哂嘴！繼而大叫：「有冇搞錯！！斷人衣食，猶如殺人父母！」

嬲死！

之後，我最想知道到底之前有沒有其他股票試過同樣情況？有邊隻妖股除淨後，突然超級無敵彈弓手，收返已宣佈的股息？

哦⋯⋯講過唔算數，你死啦！

我剛剛有 Google 過，但似乎搵唔到其他例子。你唔好話我知匯豐係史上第一隻股票咁做呀！咁到底 005 有沒有犯法，可唔可以報警告它詐騙罪？

講返我本人的持股，話多唔多，話少唔少。匯豐係我人生第一隻股票，個時因為青春就係本錢，所以真正的薪金好少，一手匯豐係我幾個月人工，真係要儲錢至可以買到。買的原因實在太簡單直接，聖誕鐘買匯豐，深信我可以靠呢隻同香港人共存亡的股票退休。

到它供股，我有供，但因為太窮唔夠錢，所以賣少少認股權，又供少少股咁。
當時的我連股權攤薄呢個名詞都唔識，更加未聽過何謂質數供股。供股後，覺得股票市場係呃錢市場，停左好長時間無再買賣股票，無增無減咁由得銀行的股票自生自減，直至5年前，因為超想退休，我先再開始進入股票市場。

由於繼續隨緣佛系管理匯豐，又雞肋，賣的話賬面好似蝕好多錢，而且同時每年派息又唔太差，所以一直都不動如泰山。隨住時間日漸過去，我不斷增加其他股票，賣出又買入其他股票，偏偏匯豐無郁過。直至今日，005仍然佔大約8%全倉。我咁長情，今次它的彈弓手行為，叫人情何以堪？所以正如祖訓明言，股票本身係唔知你有冇擁有它，同股票講感情，係自己搵自己笨。

好啦，講左咁多，咁下一步應該點做呢？眼下選擇有以下幾項：

1. 直接分手，賣鬼哂它換馬

基本上，2020年都唔駛旨意匯豐會忽然良心發現，增加派息。
咁我估完全2020完全冇息啦。沒有息的匯豐仲有冇利用價值？
現價賣出，我將會實現好重大的損失。

2. 別人恐懼，就係應該貪婪之時？
更簡單，加碼！溝！！
曾經講過幾多次，匯豐重返 $33 就係入重貨之時！

3. 繼續佛系念經。。。。。

真係煩死人，被動收入定義唔係好被動就有收入咩？點解考慮這些選項好似仲用腦過返工？

唔驚！加碼收息股！唔驚！

唔驚？！唔驚就假啦，你估真係信政府就唔驚咩。
實情係嚇死人，日日睇股市仲恐怖過睇殺人鬼片，驚心動魄，屍橫遍野，充滿唔知真定假的咀咒 （例如揸股票死得人，現金為王乜乜乜）。

講開，我最近突然想返起，小朋友時的我覺得最恐怖的鬼片叫做「猛鬼街」。
我仲記得主角們都唔可以訓著覺，一入睡夢，Freddy 就會出現，然後極度殘忍咁殺死你。

我認真咁諗過，點解自己會覺得呢套戲咁恐怖呢？

結論有三個原因（對於我自己呢種咁得閒尋求真相的精神，本人表示非常欣賞）

(1) 最恐怖當然係，唔准訓著覺呢點

由細到大，係訓覺呢個技能上我一直係練到滿點的大師級 level，攤上床 3分鐘內就會沉睡。
有時，真係好心煩（例如近期），我上到床會覺得好煩惱好多野諗，然後開始諗，如果失眠係咪要學人試下數綿羊呢？結果一定係，第二朝突然俾鬧鐘嘈醒。原來訓左！
試問我咁的異能人士，肯定係朋友間第一個訓著，然後第一個俾 Freddy殺左都唔知乜事個位，唔驚就假。

(2) 殘忍地殺人

呢個唔需要解釋，我最怕痛同血。明知做戲，見到主角流血，我都覺得會痛。
我相信如果 Freddy 殺人只會死唔會痛，咁套戲一定無咁恐怖（這是癈話嗎？）

(3) 金屬刮金屬

呢個唔需要解釋，應該好多人聽到呢種聲音都覺得難頂（我家下諗下都有少少唔舒服的感覺呢！）

去到咁遠，我只係想講，其實驚同恐懼的來源都係自己的心理。
其實只要唔係，唔準訓覺再加上吱吱聲，然後又流血又好痛咁被殺死，應該唔算太恐怖卦！

所以，係呢個充滿恐慌的日子下，我昨日又出手加碼收息股，貪其業績己出，股息亦已開估，加上現價 7-8% 的息率，及「今日唔買要等到幾時買」的具體分析下，就極速又買入了。

惠記 610
置富 778
匯賢 87001


當然，繼續選擇睇唔到股票倉 -24% 賬面值，幾咁笑看風雲......

收息股點解大跌？

我真係希望有人答到呢個問題。

最近屋企老人家問，全世界減息，照計存錢係銀行越見唔著數，理論上，收息股的吸引力應該更大（我都覺得係）。而且一般人存收息股，應該目標係收息，所以應該會 BUY & HOLD，但點解係大跌市又唔見收息股可以企穩，仲跌得鬼咁勁？

自己成手收息股，亦有做下簡表，成日都會計住每年預計收息現金流。
好多時當某隻股票勁跌，而自己加注時，就會有一種好阿Q的精神，因為雖帳面損失，但現金流增加呢（唔駛提我，我知道可以減息的）。

最近自己亂諗，收息股大跌，會唔會因為之前一般人覺得銀行息率低，等一世先得個少少息，所以加槓桿買入收息股，又安全又有現金流。但邊個諗到疫情下，連收息股都難以獨善其身，唔係跌幾個百分點，係30%, 40% 咁冧。

照計係呢個時候，如果有錢，應該更進取，因為同一項投資，可以換更多的股息。但其實會唔會因為好多人用槓桿，所以當股票跌得太深時，並唔係每個人都有可動用現金去補倉，所以被迫賣出股票呢？（我除左抽新股外未試過用孖展買股票，所以其實係完全無概念的, 有人可以免費指點下就好囉！）

惠記出左業績，係我倉內小數有加息的股票，我深感安慰。
正在諗，是否加注（現會買入，就可以坐享 8.8% 利息），實在太吸引了。

股災疫症下的第一篇

開張大吉！

這是開了n年但一直無寫的網誌，雖然自己係一直寫私人日記，但寫網誌還是第一次呢！各位看倌，就姑且看看是否可以繼續下去啦！

係香港風雨飄搖的日子，到底發生了什麼事呢？即管簡單記錄一下：

• 本人的收息股票倉，理所當然大大地蒸發了（除了沽空機構，試問誰可獨善其身？）Well，係咁意帳面幾日間蒸發了30%＋（即係無左就無左）。因為正能量，再加上典型香港仔打不死精神，梗係要 麻醉 鼓勵自己。再三強調本倉是收股息為主，賺蝕不重要（講梗係咁講），然後自我感覺良好，講講下甚至有種贏了世界又如何的皇者氣派！

• 由於無借貸無槓桿，大條道理跟股神口水尾宣稱自己絕對無裸泳（明明其實唔識游水而且身材唔好）。然後自我感覺良好，然後當然繼續睇唔到蒸發左30%的帳面值。

• 今日升少少。帳面「只係」蒸發左29.x%！YEAH 低過30%啦，跑贏好多人啦（當然亦跑輸好多人）！好明顯係人生充滿希望，自我感覺良好逹至巔峰！即刻賣哂已經賺左13%的反向恆指7300（其實得個少少錢）， 然後加好多錢再加埋所有現金隊哂去買1883。現金少到一個點，得返夠月尾的食飯錢，就係咁。

• 結論：本人直至今日收市仍然唔敢 login 自己個 MPF account。因為本人MPF 操作一向一半買哂恆指ETF ；另一半全部買哂美股指數。Well，其實又無咁極端，真相係全部 MPF 的其中 5%買左美債及環球債。所以話，風險管理係幾咁重要呢！

明明覺得心情好複雜好多野想寫，但原來認真寫起上黎，竟然已經講完。噢，原來 Blogger 不易為呢 。

我已經盡力每段隔多兩行，咁睇落篇文比較長，但都真相係第一篇都係好短！ 累死人！